پرانے زمانے کی بات ہے، ایک سرسبز و شاداب گاؤں کے قریب ایک خوبصورت جنگل تھا۔ جنگل میں مختلف درختوں کے بیچ ایک صاف اور ٹھنڈی ندی بہتی تھی، جس کا پانی ناصرف گاؤں والوں کے لیے زندگی کا ذریعہ تھا بلکہ جنگلی حیات کے لیے بھی اہم تھا۔ اسی گاؤں میں ایک ایمان دار لکڑہارا رہتا تھا، جو محنت سے اپنی روزی کماتا تھا۔
لکڑہارا صبح سویرے اپنے کندھے پر کلہاڑا لے کر جنگل کی طرف نکل جاتا۔ وہ ہمیشہ اپنے کام میں ایمانداری سے پیش آتا اور صرف اتنی لکڑیاں کاٹتا جو اس کے اور اس کے خاندان کی ضرورت پوری کر سکیں۔ وہ قدرت سے محبت کرتا تھا اور کبھی بلاوجہ درختوں کو نقصان نہیں پہنچاتا تھا۔
ایک دن لکڑہارا ندی کے قریب ایک بڑا درخت کاٹ رہا تھا۔ درخت کی شاخیں ندی کی طرف جھکی ہوئی تھیں۔ کام کے دوران اچانک اس کا کلہاڑا اس کے ہاتھ سے پھسل گیا اور سیدھا ندی کے گہرے پانی میں جا گرا۔ لکڑہارا گھبرا گیا کیونکہ وہ جانتا تھا کہ اس کے پاس اور کوئی کلہاڑا نہیں، اور بغیر کلہاڑے کے وہ اپنے خاندان کے لیے روزی نہیں کما سکتا تھا۔
مایوسی کے عالم میں وہ ندی کے کنارے بیٹھ گیا اور اپنے حال پر آنسو بہانے لگا۔ وہ سوچ رہا تھا کہ قسمت نے اس کے ساتھ کیسا کھیل کھیلا ہے۔
لکڑہارے کی مایوسی دیکھ کر ندی کی گہرائیوں سے ایک چمکدار روشنی ابھری، اور پانی کی دیوی اس کے سامنے ظاہر ہوئی۔ دیوی نے کہا
“اے لکڑہارے، تم کیوں رو رہے ہو؟”
لکڑہارا حیرانی اور عاجزی کے ساتھ بولا
“میرا کلہاڑا ندی میں گر گیا ہے۔ وہی میری روزی کا واحد ذریعہ تھا، اور اب میں نہیں جانتا کہ اپنا اور اپنے خاندان کا پیٹ کیسے پالوں گا۔”
دیوی لکڑہارے کی بات سن کر مسکرائی اور ندی میں غوطہ لگایا۔ تھوڑی دیر بعد وہ ایک چمکتا ہوا سنہری کلہاڑا لے کر واپس آئی۔ دیوی نے پوچھا
“کیا یہ تمہارا کلہاڑا ہے؟”
لکڑہارا، جو اپنی ایمان داری کے لیے مشہور تھا، فوراً بولا: نہیں، یہ میرا کلہاڑا نہیں ہے۔
دیوی نے دوبارہ ندی میں غوطہ لگایا اور اس بار ایک چاندی کا کلہاڑا نکال کر پوچھا: کیا یہ تمہارا کلہاڑا ہے؟
لکڑہارے نے نہایت ایمانداری سے جواب دیا: نہیں، یہ بھی میرا کلہاڑا نہیں ہے۔
تیسری بار دیوی ندی میں غوطہ لگا کر لکڑہارے کا اصلی لوہے کا کلہاڑا نکال کر لائی۔ اس نے پوچھا: کیا یہ تمہارا کلہاڑا ہے؟
لکڑہارا خوشی سے بولا: جی ہاں، یہ میرا کلہاڑا ہے!
دیوی لکڑہارے کی ایمان داری سے بے حد متاثر ہوئی۔ اس نے کہا: اےایمان دار لکڑہارے ! تمہاری ایمانداری نے مجھے خوش کر دیا ہے۔ اس لیے میں تمہیں تمہارا کلہاڑا واپس دے رہی ہوں، اور ساتھ ہی یہ سنہری اور چاندی کے کلہاڑے بھی انعام کے طور پر دے رہی ہوں۔
لکڑہارا خوشی سے جھوم اٹھا۔ اس نے دیوی کا شکریہ ادا کیا اور انعامات کے ساتھ اپنے گاؤں واپس آ گیا۔ گاؤں والوں نے جب اس کہانی کے بارے میں سنا تو سب نے لکڑہارے کی ایمانداری کی تعریف کی۔ یہ واقعہ گاؤں میں ایک مثال بن گیا، اور سب کو یہ سبق ملا کہ ایمانداری ہمیشہ انعام لاتی ہے۔
اخلاقی سبق: دیانت داری اور سچائی وہ خوبیاں ہیں جو انسان کو نہ صرف عزت دیتی ہیں بلکہ غیر متوقع انعامات کا باعث بھی بنتی ہیں۔
